Teamusflug

Fritig: Am Viertel ab 5i am Morge isch es für mi losgange. Ich ha miesse an Bahnhof fahre, damit ich dr Zug am 5.45 Uhr verwütsch zum am 6i am Flughafe Schiphol z'si. Unser Flugzüg, e Jumbolino, isch drum scho am 7.15 Uhr abgfloge. Mir sin au rechtzitig in Zürich acho und hän dr Zug gno nach Brienz. Dört hämr zerscht emol unser Gepäck chöne ins Hotel bringe und denn isch es au scho witer gange. Zäme mit dr Andrea und dr Monika vo dr Alpenregion simr mit dr Gelmerbahn ufe gfahre und denn hämr dört zerscht emol e Zmittagspause gmacht, bevor mr denn abegwanderet sin. Im Hotel Handegg isch denn e Sitzigszimmer für uns reserviert gsi und mir hän no e chlini Teamklausur gha. Uf die 6i simr uf Meiringe gfahre. Dört hets e Apéro geh in dr Englische Kirche vom Park Hotel du Sauvage mit allne wo hän chöne cho vo dr Alpenregion. Dr Ferdinand het au äxtra Bitterballen für uns gamcht :-) Denn simr witer ins Hotel Alpbach, wos e feins Znacht geh het. D'Andrea und dr Marco hän uns denn widr mitgno Richtig Brienz wo mr (resp. ich) frieh sin go schlofe.
Samstig: Mir sin widr frieh ufgstande und das miteme super Zmorge im Hotel. Endlich widr richtigs schwizer Brot :-) Denn simr mit em Zug uf Meiringe gfahre und vo dört us mit dr Bergbahn uf Reuti. Dört hämr widr d'Andrea und d'Monika troffe und sin zäme uf e Alpentower gfahre. Wow die Ussicht!!! Dört hämr es Päusli gmacht und dr Kristalladler agluegt und s'Gruppeföteli isch au dört entstande. Denn isch es widr abwärts gange, notürlich simr gwanderet, unter anderem entlang em Muggestutz. Uf dr Mägisalp hämr s'Trottinett packt und sin in rasanter Fahrt durab gfahre, hui das het Spass gmacht! Widr dunde acho, hämr uns ufe Weg gmacht zum Ballenberg Museum. Dört hämr e Füerig gha und e feins Zvieri kriegt. Zobe im Hotel simr denn nomol alli zämeghögglet für unseri Teamklausur und nochher hets e feins Znacht geh im Hotel.
Sunntig: Es rägnet. Abr egal, mir mache uns trotzdem uf in Richtig Rothorn, mit dr Brienzer Rothorn Bahn. Und es het sich glohnt. Churz nochdem mr dobe acho sin het sich d'Sunne zeigt und d'Nebelwand isch langsam ewäg gange... und was füre cho isch, isch e super Ussicht gsi uf dr Brienzersee. Wow!!! Uf em Brienzer Rothorn hets Zmittag geh und aschliessend nomo e Teamklausur. Denn hämr uns au scho widr miesse ufe Wäg mache zum in Brienz ufe Zug in Richtig Flughafe z'go. Am 20.15 Uhr isch unser Flugzüg abgfloge, und das sogar rächtzitig! Dr Michael isch mi denn bi dr Fähri go abhole (sone Schatz!) und ich bi totmüed ins Bett gheit.

	Das isch d'Handeckfallbrücke, die isch das Joor (2006) baut worde und isch 70m lang sowie au 70m hoch
	d'Gelmerbahn, und die seht nit nur so us, die goht wirklich senkrecht nach uffe
	uff, s'Steilste Stück hämr hinter uns
	dr Stausee wenn me obe achunnt
	die letzte so richtige Summerstrahle in däm Joor :-)
	uf unserer Wanderig...
	Sherlock Holmes lässt grüssen
	Vom Alpentower obe abe, wow, in das Näbelmeer würd me am liebste dri gumpe
	dr Kristalladler im Alpen Tower
	D'Ussicht vom Alpentower ufs wunderschöne Näbelmeer... danggschön Papi für das tolle Föteli
	S'Team vo links: Urs, ich, Pierre, Barbara, Martin, Lisette, Ingrid. D'Nicole isch leider krank gsi und het nit chöne mitcho
	nomol d'Ussicht vom Alpentower
	Uf dr Wanderig nach abe
	... ohne Worte ...
	es Föteli für dr Michael :-)
	Blüemli... schööööön
	Ballenberger Wurst, mmhhh, lekker
	Pierre und ich am schaffe im Ballenberg Museum :-)
	D'Dampflok vo dr Brienzer Rothornbahn
	s'Zügli am duruf tuckere
	Ussicht vom Rothorn uf dr Brienzersee
	s'schöne Wätter wird au vo de Gleitschirmflieger gnutzt
	Dr Gipfel vom Rothorn
	D'Brienzer Rothornbahn emol ganz (odr zumindest fascht)
	Ussicht vom Rothorn
	s'Dörfli Brienz
	s'Schiff wo zwüsche Brienz und Interlake fahrt