Rafi uf Bsuech

Vom 1.7.-3.7.2006 isch mi dr Rafi do in Amsterdam cho bsueche. Ich ha mi mega gfreut ihn widr z'gseh und mir hän e lessigi Zit zäme gha. Er het au guet Wätter mitbrocht :-)
Samstig: Er isch am 8.55 Uhr in Schiphol acho und do ich am Samstig jo nit schaff, bi ich en au go abhole. Abr wie chönnts au andersch si, d'Züg do in Holland hän mol widr Verspötig gha und schlussendlic bin ich au z'spot am Flughafe gsi... Abr mir hän jo zum Glück no e ganze Tag vor uns gha. Bi däm schöne Wätter simr denn au zäme mit dr Juliane und dr Saskia an Strand uf Zandvoort. Dört chunnt me sich ame schöne Wucheend vor wie am Strand vo Palma :-) e riese Fleischschau und jedi zweiti oben ohne... naja, me muess jo nit alles nochemache :-) mir häns uf alli Fäll richtig gnosse.
Zobe simr denn ins Panama go shake. Ich bi sälber no nie dört gsi und ich muess sage, es het mr gfalle! Mir sin sogar au no gfötelet worde und hän somit no es Adänke an dä Obe :-)
Sunntig: Am Sunntig simr e chli go d'Stadt aluege. Agfange hämr mit em Botanische Garte, wo zwar eher chli isch, abr ächt schön, het mr gfalle. Denn simr über d'Java Ijland gfahre und hän so e chli die neuere Gebiet gseh vo Amsterdam. Zum Schluss hämr abr au no e chlini Tour durch s'Zentrum gmacht und dr Rafi het sich tolli neui Hose kauft! Znacht gässe hämr denn im Jordaan imene härzige Restaurant, dusse uf dr Terrasse. Zum Abschluss hämr im Gantinero no öbbis trunke.
Mäntig: Tja, s'Wucheend isch wie immer viel z'schnell vrbi gange und ich ha widr miesse go schaffe und dr Rafi het sich elei uf d'Söcke gmacht. Zobe hämr denn no Spaghetti Bolognese kocht und zäme gässe und denn het er au scho widr uf e Bus miesse in Richtig Flughafe. Es isch e kurzi Zit zäme gsi, abr drfür au e lessigi!

	wie gseit, am Strand in Zandvoort isch am Wucheend bi schönem Wätter ganz Amsterdam :-)
	abr mir zwei hän au no es Plätzli gfunde...
	...zäme mit dr Juliane und Saskia hämrs uns gmietlich gmacht
	Mir drei, meh odr weniger kurz vor em Usgang
	und do no zäme mit dr Saskia. Jä ich glaub d'Juliane fühlt sich wohl
	So, jetzt chöme mr zum botanische Garte. Ich ha dängt ich vrsuech mol em Papi e chli Konkurrenz z'mache. Abr kei Angst, das schaffi glaub nit :-)
	und do no d'Blueme e chli nöcher
	Die "Wasserfänger" sin um einiges grösser als ich
	zwei lustigi Kaktus
	wow, e riese Kaktus
	ich glaub sie mien das Gwächshus gli emol verhöche
	oooohh, e Schmetterling
	und grad nomol eine
	mmmhh, Ananas, isch abr no ganz klei
	hm, isch das ächt e Mohnblueme? Uf alli Fäll het sie mr gfalle
	Gugguseli... :-)
	In dr Mitti sins 8 Meter bis ins Wasser. E Brugg äxtra zum ins Wasser gumpe :-) ich glaub ich würd mi do au eher ans Seil halte und e chli hi und her schwinge bevor ich ins kiehle nass itauche würd...