Ostere

Ich ha vom 8. April bis am 17. April Ferie gno und bi heime gange uf Basel. Dört ha ich e mega schöni Zit gha zäme mit minere Familie und mit (fascht) allne Fründe! Ich has mega gnosse, bi viel in Usgang, no e Tag go Skifahre, Auto gfahre (jo uf das hani mi ächt gfreut!), fein griechisch go ässe und zum krönende Abschluss isch dr Michael au no uf Münchestei cho übers Osterwucheend. Ihm hani denn e chli Basel zeigt und en an alli Feschter mitgschleppt :-) e superguete und lessige Brunch bi mim Schwösterhärzli und em Giuseppe, ins Bärau zum Geburtstag vo minere Tante und zum Geburtstagsässe vo dr Nicole. Eso het er mol schnell schwupp di wupp in 3 Täg alli Lüt um mi ume kenneglernt :-)


Also, am Fritig am 14.4. isch dr Michael in Basel acho. Denn simr zersch schnell zu mir heime und denn hani e chlini Stadtfüerig gmacht (ich glaub die geboreni Füererin bini nit, mir sin e chli im Kreis gloffe). Ich han em notürlich s'Münster zeigt wo leidr zue gsi isch zäme mit dr Pfalz. Denn simr durch d'Freiestross gloffe (wow es het e paar neui Läde!) und übere Märtplatz gloffe. Go gässle simr notürlich au kurz und denn mit dr Fähri übere Rhy gfahre. In dr Bar Rouge hämr denn e Apéro gno (mmhhh Caipirinha) und ufem wäg zu dr Catherine hämr no bim Tinguely Brunne e Halt gmacht. Bi dr Catherine hämr denn Znacht gässe, isch mega fein gsi! Sie het e super Dessert gmacht! So, abr jetzt zersch mol d'Föteli vo däm Tag!

Do hani emol verschiedeni Funktione vo minere Kamera usprobiert.

	Juhu, ich has gschafft dass mr beidi uf em Föteli druf sin :-)
	Do simr beidi scho e chli hungrig gsi, aber bi däm schöne Wätter hämr glich no e chli miesse dusse in dr Sunne sitze!
	:-) ich glaub mir sin scho e chli mied gsi und hän sehr kurligi Fotiobjekt gwählt.
	mit dere Fähri (bim Münster) simr au übere Rhy gfahre.
	Nomol d'Münsterfähri, abr dismol mit Ussicht uf e Mässeturm mit dr Bar Rouge.
	Basel mit dr Mittlere Brugg und em Käppelijoch.

Am Samstig, dr 15.4. simr denn ebbe bi dr Dani und em Giuse gsi go brunche. Drbi gsi sin s'Mami und dr Papi, s'Grossmami, d'Edith und dr Georges. D'Dani und dr Giuseppe hän e mega schöne Tisch vorbereitet und es het ächt alles geh was s'Herz begehrt. Ich würd sage ich ha mi eimol meh überässe. Aber das Auge isst ebbe mit und bi somene schöne Tisch cha me eifach nit wiederstoh. Näbem Ässe isch es au suscht mega gmietlich gsi, Dani, das dörfe dr gärn widr emol mache :-)

	eso hets usgseh bevor mr zuegschlage hän... mmhhh... do lauft eim grad s'Wasser im Mul zäme!
	Do isch d'Dani grad am Saft ischänke wo sie sälber gmacht hän.
	do isch dr Giuseppe (dr Chefkoch) grad am Buurefrüestück mache!
	oh, es Butterhäsli... wer will das köpfe? Hejo, dr Papi loht sich do nit zweimol bitte :-)

Und am letzte ganze Tag woni in dr Schwiz verbrocht ha simr wie gseit ins Bärau gfahre zum dr Geburtstag vo dr Mädle z'fiire. Mir hänere e Skype Usrüstig gschänkt und ich hoff, dass ich sobald ich denn au Internet im Zimmer ha, au emol mit dr Mädle cha telefoniere. Usserdäm hets e super Zmittagässe geh. Ich ha allerdings keini Föteli gmacht, do dr Papi scho viel gfötelet het. Unter anderem au mi und dr Michael, das sin die einzige Föteli woni im Moment ha, drum mien dr euch leider mit dene begniege :-)