Natascha uf Bsuech

Mi Krümel isch mi cho bsueche!!! Ha mi mega gfreut! Und sie het sogar zimlich guet Wätter mitbrocht, es isch zwar nit ganz so warm gsi wie in dr Schwiz, aber d'Sunne het gschune und mir häns gnosse.
Fritig: Am 6i bini d'Natascha am Bahnhof go abhole und denn simr zämr mit em Michael in d'Pizzeria go Znacht ässe, mmhhh... isch fein gsi :-) Zobe hämr denn e chli in Usgang welle und hän uns zäme mit dr Nayeli, Valérie, em Markus und em Michael troffe. Zersch hämr im Coco's Cocktails gnosse und denn hätte mr welle go tanze... aber irgendwie hämr nit eso richtig Glück gha. Ich glaub es isch dr Tag vo de Gästelistene gsi, an ca. 3 Ort wo mr gsi sin hets gheisse: "Gastenlijst!" und mir sin notürlich niene druf gstande :-) schlussendlich simr denn im Escape glande und sin doch no es bitzli zum tanze cho.
Samstig: mir sin relativ frieh ufgstande und hän uns Zmorge gholt im Bagels & Beans und hän uns an d'Gracht gsetzt (jäwohl, Gracht und nit Fluss!) und häns uns guet goh loh. Denn hämr zäme mit em Michael uf em Fiets d'Stadt erkundet, e chli glädelet und zum Schluss im Rembrandtpark usgrueht. Zobe simr zäme mit dr Juliane und em Michael go tanze. Unseri Plän hän sich dr ganzi Obe gänderet und schlussendlich simr im Zebra glandet. Es isch absolut genial gsi und mir hän so richtig abgshaked!
Sunntig: Au hüt hämr nit usgschlofe, sondern so viel wie möglich us unserem letzte Täg zäme in Amsterdam welle usehole. Agfange hämr widr im Bagels & Beans wo mr zmörgelet hän. Denn simr ins Foltermuseum und aschliessend no ins Sexmuseum. Tja, und denn isch das Wucheend au scho widr vrbi gsi und ich ha d'Natascha an Flughafe brocht.

	Natascha und ich vor em Brunne :-)
	die bekanntisti Brugg vo Amsterdam, die Magere Brug... aber sie isch grad am ufgoh, wow, das seht me nit jede Tag!
	ok, ich glaub nur wäg däm chline Böötli isch sie ischr nit ufgange :-)
	Mir drei am relaxe im Park
	d'Natascha am warte uf s'Zmorge, smile!
	s'Foltermuseum