Mami und Papi uf Bsuech

Vom 1.9.-5.9. win mi s'Mami und dr Papi cho bsueche. Dr Papi het gschäftlich miesse uf Dütschland und das 200km wäg vo Amsterdam. Also het er s'Mami mitgno und sie sin nochher no zu mir cho :-) und das hani notürlich super gfunde wil mr so hän chöne mi Geburtstag zäme fiire!
Fritig: Sie sin öbbe am 3i bi mir im Büro cho lüte. Drbi hani gmeint sie chäme erst am spötere Obe ah. Abr sie sin schneller fertig gsi als erwartet bim schaffe. Also ha ich ihne grad chöne s'Büro zeige und ihne uf dr Karte erkläre wo ihres Hotel ligt. Zobe simr denn zäme go Znacht ässe und mis Zimmer go aluege.
Samstig: Ich ha Geburtstag! Mir hän uns zu dritt ufe Wäg gmacht und sin in Zoo Artis gange in Amsterdam. Dä hani scho lang emol welle gseh und dr Papi het sich notürlich scho gfreut ufs Fötele. Dr Zoo isch richtig lessig gsi, mir sehr vielne Tierarte und mir hän no chöne enere Aasvogelfüeterig zueluege. Abr me merkt scho, dass dr Zoo scho sehr alt isch und drum au dr Platz wo die einzelne Tier hän sehr beschränkt isch, nit so wie in Basel wo sie jo fascht alli Gheg am vrgrössere sin. Uf alli Fäll hämr e richtig schöne Tag gha und zum Abschluss hämr denn no agstosse und sin bimene super feine Italiener go ässe mitere sehr sympathische Bedienig wo sogar Italienisch gredet het.
Sunntig: es schifft und schifft und schifft in ströme... mir hän uns abr glich ufe Wäg gmacht nach Alphen a/d Rijn zum grösste Vogelpark vo Holland. Wo mr dört acho sin, hets au scho e chli weniger grägnet und mir sin grad als ersts ins Vogelhus wo mr im Schärme gsi sin. Dört simr die einzige Bsuecher gsi wil so frieh no niemer ume gsi isch (nit bi däm Wätter). Das hämr notürlich gnosse. Dr Rescht vom Tag isch es denn au trocke gsi und mir hän alles chöne aluege, isch sehr witläufig und het vieli tolli Vögel gha. Au dr Park an sich isch sehr schön aglegt gsi und het in dr Mitti es Hotel mit Seminarrüm für Gschäftslüt. Zobe simr denn au widr uswärts go ässe, dismol Thailändisch. Ich ha e Glasnudelsalat bstellt wo eigentlich guet gsi isch, abr sooooo krass scharf, dass es nit emol mi Papi het chöne ässe. Ich has denn abr gschafft und dr Teller usgässe :-)
Mäntig: Ich ha nacheme super Wucheend mit em Mami und Papi leidr widr miesse go schaffe. S'Mami und dr Papi hän sich also elei ufe Wäg gmacht und hän zersch e Grachtefahrt gmacht. Denn sin sie mit em Auto nach Zaanse Schans gfahre und hän d'Mühlene agluegt. Ufem Heimweg sin sie denn alles am Strand entlang gfahre und hän au no dört viel gseh. Zobe hämr uns denn zum letzte Mol troffe und sin nomol uswärts go ässe. Dr Papi und ich hän uns Spear Rips gönnt :-) Jo und denn hani au scho widr miesse tschüss sage, do sie am Zischtig Morge widr ufbroche sin in Richtig Schwiz.

	die fuule Leuewiibli, ich glaub me seht wer Chef isch
	Drum ligt dr eigentlichi "King" au lieber am andere Endi vom Chäfig
	Dr Dumbolino uf Entdeckigstour
	d'Wöschbäre mit ihrne bättlende Auge
	dr klini Panda, dä hani do zum erste Mol gseh
	d'Seeleue ganz fuul am "sünnele"
	und au s'Nilpferd gniesst die paar wenige Sunnerstrahle
	s'Mami und dr Papi am Päusli mache
	guet, het nit so ganz funktioniert, mi Arm isch doch eifach es bitzli z'kurz :-)
	und do au no ich mit em Papi und sinere Kamera
	Hm, ich das ächt so öbbis wie e Nasebär?
	do hani scho gmeint ich sigi in Kopenhagen :-) die Ente het sichs do au ganz schön gmietlich gmacht
	Ringkampf zwüsche zwei Vögel, guet ich weiss, es isch nur eine ufem Föteli, abr wenn me genau luegt gseht me dr Fuess vom zweite rechts unde
	Pingu mägmägmäg...
	e Lüchtturm äxtra für mi :-)
	e Aasfrässer wo sini Eier mit eme Stei ufbricht
	wow, die graziöse rote Aras
	und do au no die blaue, s'Highlight vo dr Vogelshow
	und do hämr unsere Vogel wo s'Geld gno het vo de Lüt und in dr Topf inegworfe het (für e Vogelprojekt). Hanem au e Münze geh, abr er kas denn au mit Nötli :-)