Jenny in Amsterdam

s'Mami uf Bsuech
Vom 23. Juni ah bis am 27. Juni isch mi s'Mami do cho bsueche. Ha mi gfreut ihre zeige z'chöne, wie und wo ich do so läb, wo dass ich schaff und so witer. Agfange hets notürlich grad emol drmit, dass ich z'spot an Flughafe cho bi... es het gheisse sie lande am halbi 9i, do ha ich halt dängt 9i sött scho länge. Denn sin sie abr scho am 5 ab 8i glande und s'Mami isch am halbi scho dusse gsi! Hi, chum bini nüm in dr Schwiz, wirdi au scho unpünktlich :-) nenei, ich hoff mol nit, dass es so schlimm isch! Ha halt em Michael au no miesse tschüss sage, das het halt au no chli Zit brucht. Abr ich ha se denn uf alli Fäll abgholt und mir sin zu mir heime und ich ha em Mami au zersch mol no öbbis z'ässe gmacht und ihre mis Zimmer zeigt. Denn simr denn eigentlich au scho go schlofe, nachdem mr e chli besproche hän was mr so wänn mache.
Samstig: Mir sin frieh ufgstande und hän dr Zug gno in Richtig Middelburg. Dört isch uns d'Natascha am Bahnhof cho abhole und mir sin zu ihre heime. S'Mami het denn s'Huus und d'Zara zum erste mol gseh. Sie isch scho mega gwachse und e richtige Strahlemann (es sei denn sie wird grad vomene wachsende Zahn blogt). D' Nanny isch denn mit ihrem neue Ma, em Rudi, au no cho und mir hän typisch holländisch Zmittag gässe :-) Am Nomitag simr denn no chli in d'Stadt und ufe Märt, es isch richtig schöns Wätter gsi zum Glück. Zobe hämr uns denn widr in Zug gsetzt und sin zrugg uf Amsterdam gfahre.
Sunntig: Dr Tag vom Mami und minere Velotour... hui, an däm Tag isch ächt viel passiert :-) Es het drmit agfange, dass ich zersch emol 2 mol widr ha uffe ins Zimmer miesse wil ich öbbis vrgässe ha. Zersch isch es dr Veloschlüssel gsi und denn hani gmerkt, dassi mini Linse nit ah ha. Denn hani dängt jetzt bini endlich parat und was gsehni denn... em Michael sis Fiets isch wäg! Ich ha gmeint ich spinn, ha mi fascht nümi chöne beruhige... abr tatsächlich, es isch klaut worde! Tja, guet, nochdem ich mi beruhigt ha, isch denn s'Mami mit em Tram an Bahnhof gfahre und ich mit mim Velo. Dört simr ins VVV go Infos hole, hän em Michael sis 2. Fiets gholt und hän uns ufe Wäg gmacht (obwohls scho chli afo idunkle het). In Amsterdam Noord isch alles so schlecht agschriebe, dass mr uns als ersts grad emol e chli vrfahre hän. Zum Glück abr nit allzu erch, mir hän unsere Wäg uf alli Fäll denn doch no gfunde. Unterwägs hets e chli afo tröpfele, zum Glück abr nit fescht. Mir hän denn imene härzige Restaurant in Durgerdam öbbis gässe und uns überlegt ob mr wirklich bis Marken wän fahre odr vorher umdreie. Hän uns denn entschlosse witer z'fahre. In Uitdam hämr denn nomol e Kaffipause iglegt und hän uns ufe Wäg gmacht fürs letzte Stückli nach Marken. Wo me denn acho sin hämr gmerkt, dass es sich ächt glohnt het, isch e super härzigs Dörfli! Mir hän alles e chli a gluegt und hän au nomol öbbis trunke. Denn hämr uns au scho langsam ufe Ruckweg miesse mache... nur leider hets jetzt scho richtig agfange rägne. Das heisst mir sin dr ganzi Heimweg bi Räge heime gfahre. Mir hän denn e kürzere Weg gno zmittst durch d'Felder und nocheme Zitli, wo mr eh scho nass gsi sin, isch es sogar no richtig amüsant worde. S'Mami gmietlich in ihrem hoche Gang näbe mir und ich voll am abstrample mit mine 0 Gäng :-) mir hän drum e chli Gas geh. Mir sin au richtig schnell in Amsterdam Noord gsi, aber wie scho gseit isch dört nit sehr viel agschriebe... mir hän uns vrfahre. E nätti Holländerin het uns denn dr Wäg zu dr Fähri zeigt. Uff hani dängt, endlich deheime. Abr wie chönnts au andersch si, d'Jenny nimmt e andere Weg vom Bahnhof heime und vrfahrt sich nomol... uiuiui, und das nocheme halbe Joor in Amsterdam :-) abr es het passt zu unserem Tag. Mir häns denn abr doch no gschafft und sin ko und nass bi mir deheim acho. Dört hani mi denn ganz warm azoge und uf die halbi 7i simr ins Moeders go Znacht ässe. Das hämr uns denn so richtig vrdient und au so richtig gnosse! Mir hän e holländischi Rijsttafel gässe, isch richtig guet gsi! Ich glaub in dere Nacht hämr denn beidi richtig guet gschlofe :-)
Mäntig: S'Wucheend isch leidr immer viel z'schnell vrbi und ich ha widr miesse go schaffe. S'Mami isch ins Anne Frank Haus und denn no d'Stadt go aluege. Sie het sooooo viel Sache gseh, ha grad es paar neui Idee für mi chöne sammle, was ich emol no möcht go a luege. Am 5i isch sie mi denn im Büro cho abhole (und het s'Büro chöne a luege) und mir sin no zäme im Metz & Co go e Kaffi trinke und d'Ussicht fötele. Denn simr zäme go chinesisch ässe und sin mit em Fiets no zu dr Magere Brug gfahre (bi Niedelräge).
Zischtig: Wow, scho em Mami ihre letzte Tag in Amsterdam. Sie isch ins Van Gogh Museum und het denn au widr d'Stadt erkundet. Zobe hämr uns bi mir deheime troffe und hän in dr Snackbar die unverzichtbare Kipcorn und Patat gholt und i mim Zimmerli gässe. Denn het s'Mami au scho ufe Bus für an Flughafe miesse.
Ich ha die Zit mit em Mami richtig schön gfunde und gnosse.

S'Mami und ich in Middelburg bi dr Natascha

	D'Zara am trinke mit ihrne strahlend blaue Auge!
	D'Holländer sin eifach gek wenns um Fuessball und Oranje goht, do wird sogar kurzerhand s'Wasser im Brunne orange :-)
	unterwägs in dr Stadt am Märt

Unseri Velotour nach Marken

	Unseri ersti Pause. Ich wird langsam zum Profi im vo mir sälber Fäteli mache :-)
	s'Dörfli Durgerdam
	e lessigi Brugg wo me seht vo Durgerdam us
	Dr ca. 2km langi Dam wo Marken mit em Festland vrbindet
	Juhu, Marken im Horizont
	So Brugge gits in Marken ganz viel, jedi het notürlich e andere Name
	Das isch e Holzschuehmacherei
	Die typische Hüser vo Marken
	Dr Hafe
	und wils so schön isch grad nomol es Föteli am Hafe