Kopenhagen

Es isch Pfingste und mir hän e langs Wucheend! Für dr Michael und mi isch das e Grund gsi zum luege was es für billigi Flüg git und denn ab in e für uns no unbekannti Stadt. Bi unserer Suechi isch Kopenhagen usecho, mir sin mit Transavia gfloge. Falls es öbber interessiert, das sin die griene Flight Attendants :-)
Aber jetzt vrzell ich zersch emol was mr alles so gmacht hän!
Samstig: Am 12i simr in Amsterdam abgfloge, und s'tolle isch gsi, dass mr hän chöne über s'Internet i checke. Eso hämr unseri Sitz sälber chöne ussueche und do mir nur Handgepäck gha hän, hämr au nümi miesse astoh. Dr Flug isch bis uf d'Landig toll gsi, abr denn bi dr Landig simr ächt nur durch Wolke gfloge und es isch alles wiss gsi um uns ume und wie das halt so isch in de Wolke hets notürlich zimlich gwacklet! Es het denn zersch au no e chli grägnet wo mr acho sin. Mir sin denn grad als ersts ins Touristinfocenter, dört gits mega viel gratis Prospekt und sogar au gratis Stadtplän. Mir hän uns denn grad ideckt und sin ab ins Hotel. Das het vo usse e chli schäbig usgseh, isch aber top suber gsi und für e Wucheend perfekt. Denn hämr mol chli d'Stadt uskundschaftet, resp. s'Zentrum. Mir sin no churz go lädälä (dr Michael het tolli Jeans, Badhose und Flip Flops kauft!). Zobe simr denn in e feins Restaurant go ässe und denn no witer in e Jazzclub. Nur bin ich denn soooo mied und ko gsi, dass mr nümi hän möge warte bis d'Liveband cho wär und zrugg ins Hotel sin go schlofe.
Sunntig: Dä perfekti Tag!!! Ächt super Wätter hämr gha abr nit zu heiss (immer mit eme chline Lüftli). Mir sin äxtra nit allzu spot ufgstande und hän uns ufe Wäg zum Wohrzeiche vo Kopenhagen gmacht, dr kline Meerjungfrau. Uf em Wäg hämr uns sogar chöne 2 vo de 2200 gratis Velos in Kopenhagen ergattere, die funktioniere glich wie unseri Ikaufswägeli, me muess 20K inestecke und cha se mitneh und kriegt s'Geld widr, wenn mes widr an ein vo de viele Standplätz zrugg bringt. Me muess allerdings nit meine das sige super Velos, im Gegeteil, aber sie erfülle ihre Zweck. Bi dr kline Meerjungfrau hets ächt e ganze Huffe vo Touriste gha und es isch e Kunst gsi es Föteli ohni Mensche z'mache! D'Meerjungfrau sälber hani nit so spektakulär gfunde, aber d'Umgebig vo dört wo sie stoht isch ächt mega schön! Denn hämr uns zum Königspalast ufgmacht. Dört gits wie in England am 12i e Changing of the guards. Nur seht mes besser als in London wil me nöcher ahne stoh cha. Isch witzig gsi zum luege wie die "Soldate" marschiere. Denn simr witer zum runde Turm. Dä isch speziell wil me ufe laufe cha, allerdings nit übere Stäge, sondern em Weg entlang wo dr Wand entlang vom Turm glegt isch. Vo unde seht er gar nit so hoch us, aber wenn me erst emol obe isch het me e super Ussicht über die ganzi Stadt. Me seht sogar bis Schwede! Es het e mega lessigi Brugg wo uf Schwede übere goht, die seht me au! Noch däm Turm hämr langsam afo Hunger kriege und hän ein vo de Hot Dogs probiert wo me an jedem Ecke e Stand findet. Die schiine typisch Kopenhagen z'si. Am Nyhavn (Stross miteme Kanal in dr Mitti und vielne Kafis, Zobe sölls dört guet si für Usgang) hämr denn e chli relaxt und ich ha e Glace gnosse und dr Michael e chalts Bierli (do seht me wäm vo uns was wichtiger isch :-)). Mir hän denn eigentlich welle e Bootsfahrt mache, aber es sin sooooo viel Lüt agstande, dass mr uns das denn doch andersch überlegt hän. Mir sin denn in Tivoli Park, au eini vo de Attraktione in Kopenhagen. Das isch e kline Europa Park zmittst in dr Stadt. Ich find zwar er verhältnismässig tür, aber uns hets mega Spass gmacht. Ich ha sogar no e Schlüsselahänger gwunne bim Murmeli schloh (Murmeli chöme us de Löcher und me muess se mit eme Hammer schloh, me spielt gege öbbe 5 anderi und ich ha am meiste vrwütscht!!!). Zobe hämr zersch no welle chli furt go, aber wo mr im Hotel acho sin, simr so öbbis vo ko gsi vom viele laufe, dass mr uns das doch andersch überlegt hän. Im Hotel hämr erst gmerkt, wieviel Sunne mir abbecho hän, was notürlich toll isch, aber halt au sehr mied macht. Dr Michael het übrigens e chline Sunnebrand gha, ich zum Glück nit.
Mäntig: Wow, scho widr heime... das Wucheend isch widr emol gfloge, aber mir hän jedi Sekunde drvo in volle Züg gnosse! Am 13.00 isch unser Flugzüg gfloge, drum simr noch em Ufstoh und Zmorge ässe eigentlich au scho grad in richtig Flughafe ufbroche. Dört hämr denn no unseri letschte Krone ufbrucht und es paar Karte gschriebe. Und ich has nit chöne glaube, abr bi dr Landig in Amsterdam simr scho widr nonstop durch Wolke gfloge! Und es het notürlich widr wie wahnsinnig gwacklet :-) Deheim hämr uns denn no e gmietliche Tag gmacht bim Michael und s'Wucheend so richtig usklinge loh.

	Kopenhagen isch jo wie au Amsterdam e chli e Stadt am Wasser. Das isch eine vo de See in dr Stadt, dä heisst Skt. Jorgens So.
	hm... weiss leidr scho nümi was das füre Hus gsi isch...
	E Platz uf dr Ikaufsstross Stroget mit eme Strossekünstler. Die hän übrigens ihri Shows immer uf Englisch gmacht.
	Am Endi vo dr Ikaufsstross chunnt me zum Kongens Nytorv, e grosse Platz wo rundume d'Autos fahre.
	E lessigs Huus unterwägs. Bi dene Läde chönnt me meine me isch in Amsterdam, und denn hets sogar no e Fläschezug!
	Bi däm riisige Anker foht Nyhavn ah.
	Am Samstig hämr wie gseit nonig so schöns Wätter gha, gseht abr glich lessig us findi!
	und do no es Föteli mit Sicht uf alli Kaffis.
	Sunntig, und wie me seht, strahlends Sunnewätter! Grund gnueg zum d'Sunnebrülle azieh :-) das sin unseri Gratis Kopenhagen-Velos.
	Und do ich no mit de Velos... voll bepackt!
	Do simr vrbi gfahre ufem Wäg zu dr kline Meerjungfrau. Ich glaub das isch e Kaserne, sehr zumindest so us, und e Ma in Grien hämr au gseh :-)
	Die lessigi Kirche isch au ufem Wäg (glaub mir hän e chli e Umweg gmacht) zu dr kline Meerjungfrau gsi.
	Wow, Wasser! Me het chöne meine bi däm Brunne halte alli Touristebüs, au wenns do grad nit so usseht.
	Juhu, die klini Meerjungfrau... mit Betonig uf chli :-)
	Und das isch d'Opere vo Kopenhagen.
	Juhu, es Touristeföteli vom Brunne bim Königspalast :-) dr Michael het zerscht nit so recht welle anesitze, aber hets denn glich no gmacht.
	Und zum zweite... oder hani vilicht nur e Usred brucht zum vom Michael es Föteli z'mache? ;-)
	Changing of the guards... eins zwei eins zwei eins zwei...
	und grad nomol, eine stiffer als dr ander!
	dr bekannti und spezielli Ufstig ufe runde Turm.
	Ussicht vom Runde Turm. Do seht me sogar bis zu dr Brugg uf Schwede.
	Ussicht vom runde Turm.
	Ussicht vom runde Turm.
	Ussicht vom runde Turm.
	Ussicht vom runde Turm.
	Dr Michael und ich, scho e chli mied ufem Bängli in schwindelnder Höchi :-) nenei, nur ufem Turm.
	Und do simr noml bim Nyhavn, dismol mit Sunneschiin :-)