Koninginnedag

Jedes Joor am 30. April isch in Holland Koninginnedag und s'ganze Land fiirt! Aber ganz speziell isch dä Tag in Amsterdam. Das Joor isch dr 30. April e Sunntig gsi, drum het mes ufe 29. vorverlegt. Uf de grosse Plätz im Zentrum hets Kermis geh und es het in dr ganze Stadt tusigi vo Lüt (vrglichbar mit dr Street Parade). Alli sin orange azoge odr trage irgend es oranges Accessoire und alles isch in orange dekoriert. Die ganzi Stadt verwandlet sich an däm Tag in e riesige Flohmärt, wil alli Lüt wo wän ihri Sache chöne verkaufe. Do gits denn au ganz schlaui Lüt wo mit irgendwelche guete Idee vrsueche Geld z'verdiene, wie zum Bispiel Eier wärfe uf e Ma mitere G. W. Bush Maske. Me het notürlich au überall Musik und uf de Grachte hets e Art Grachteparade mit all de Boot wo unterwägs sin. Ich ha mi an däm Tag mit dr Juliane, em Miguele und em Michael ufe Wäg gmacht. Zersch simr e chli umenandgloffe und hän alles bestunt, denn hämr noch langem warte uf es Boot chöne zäme mit es paar Iire :-) ok, d'Erklärig wieso mir uf das Boot hän chöne isch e chli lang und kompliziert, drum loh ich das jetzt lieber. Abr es isch absolut genial das ganze vomene Boot chöne z'beobachte und glichzitig zu dr Musik vo all de andere Boot abz'tanze :-) Nur Zobe simr denn alli so mied gsi, dass mr nur no gmietlich sin go ässe (boah, e Platz z'finde isch ächt nit eifach, ich sag nur Beziehige muess me ha :-)) und denn bim Michael e Film gluegt hän (L.A. Crash, ächt empfehlenswert) und so dr Obe lo usklinge loh hän. Ich ha au ganz viel Föteli gmacht, do e chlini Uswahl drvo.

	Mir vier (Michael, ich, Juliane, Miguele) unterwägs
	d'Damstross mit all de chleine Verkäufer und vielne Lüt
	"unser" Boot no am warte... dekoriert hämrs scho :-)
	d'Juliane mit ere Fründin und dr Michael ufem Boot. Wow, 2 Iire sin au scho do, ufem Dach :-)
	und schwup het d'Juliane au scho e Huet becho... mmhhh was trinkt sie denn do? O-saft... lekker :-)
	scho 3 Iire ufem Dach, und scho am suffe :-)
	es Boot wo ans uns vrbi gfahre isch während däm mr gwartet hän
	d'Juliane mit 2 Fründinne
	Tusigi vo Lüt uf dr Brugg wo sich in d'Mengi quetsche... do hän mirs besser :-)
	Achtung Brugg! Tja, ufem Dach shake cha asträngend si bi all dene Brugge
	Es Schiff im Königliche Gwand
	Und do es paar Idrück wies uf dr Prinsengracht (am Koninginnedag herrscht do zum Glück Einbahn) zue und her gange isch
	tja, nit alli Boot sin so stabil wie unsers :-)
	dr Michael mit sim Huet... smile!
	und do ich ihn scho uf d'Website gsetzt ha, muess ich doch au s'Föteli mit mir und em Huet druf tue... has ihm drum "verbote" bi sich druf z'tue :-)
	Wer isch denn do an die vorderi Front vom Boot klätteret? D'Juliane mit ihrer Fründin
	dr hinteri Teil vo unserem Boot, so seht me wieviel Platz mir gha hän!
	und grad nomol d'Ussicht nach hinde vom Dach us (dr Michael het gfötelet)
	d'Juliane und ich
	juhu, er isch widr vom Dach abe gho...
	jetzt gohts ab...
	d'Leidsestraat Zobe noch dr Grachtefahrt. Voll mit Lüt wo öbbis zum ässe sueche!