Eva in Amsterdam

D'Eva isch mi cho bsueche, juhui. Sie isch die ersti wo mi mit Easy Jet isch cho bsueche. Wow! Nur het d'Jenny leider e chline (odr ebbe nit so chline) Fehler gmacht und nit in d'Agenda gluegt, wos drum gange isch amene Event wo mir (also Schwiz Tourismus) organisiert hän z'schaffe. Es isch ebbe eigentlich e mega lessige Event gsi, aber ich ha leidr viel z'spot realisiert, dass jo d'Eva denn do isch. Dummdummdumm... jenu, ha immerhin chöne am Fritig frei neh und so hämr glich no e ganze Tag zäme gha und d'Öbe umso mehr gnosse. Has e super Zit gfunde mit dir Eva, und du hesch au als ersti dr Michael chöne kennelerne :-)
Donnschtig: Ich bi d'Eva noch em schaffe am Bahnhof go abhole und denn simr zersch zu mir heime und hän öbbis Znacht gässe. Denn simr mit em Michael zäme no öbbis go trinke und nochher no in Melkweg. Ich bi sälber no nie dört gsi, ha abr scho viel drvo ghört gha. Es isch eher alternativ dört, abr het mr ächt no guet gfalle. Nur simr beidi mega mied gsi und am 2 au scho widr heime gange. Dört hämr denn no Popcorn in dr Mikrowelle gmacht... die erschte sin schwarz worde :-) abr ha zum Glück 3 Pack gha, bim 2. hets denn klappt :-)
Fritig: Juhui, ich ha frei. Mir sin gmietlich im Bagles and Beans go Zmörgele, denn go lädälä (das muess me eifach mache wenn me uf Amsterdam chunnt!). S'Lädälä macht au immer e chli mied, drum hämr denn e gmietlichi Grachtefahrt gmacht. Zobe simr vom Michael sinere Schuel iglade worde zum go Mexikanisch ässe, isch mega fein gsi!
Samstig: Ich ha miesse in Den Haag an unserem Bever Event schaffe. D'Eva isch sälber nomol loszoge und het so richtig viel ikauft :-) Zobe simr denn wie s'sich ghört go Pancakes ässe und denn no ins Kino zäme mit dr Juliane. Mir hän Ice Age 2 gluegt :-) isch mega witzig gsi, also empfehlenswert!
Sunntig: Ich ha widr miesse uf Den Haag go schaffe. Dos gregnet het, isch d'Eva ins Van Gogh Museum und denn het sie au scho widr an Flughafe miesse zum zrugg uf Basel fliege. Ich muess sage das Wucheend isch viel z'schnell ume gange! Abr ich ha jedi Minute zäme mit dr Eva gnosse! Nur leidr hani nit so viel Föteli gmacht, abr die paar woni ha sin notürlich do inne (au wenn sie nit so dr Hammer sin).

	Im Hintergrund seht me unser Grachtefahrtbötli. Und wow, es seht us als ob scho Früehlig wär in Amsterdam :-)
	Ok, ich weiss es spieglet widr. Abr das Schiff hani eifach miesse fötele. Das chunnt vo Basel über dr Rhy uf Amsterdam!
	damit mir au no es Föteli vo uns zäme hän, hämr halt sälber eins gmacht... nei, do simr gar nit mied :-)
	und zum zweite... do muess me no afüege, dass es frieh am Morge isch!