Edith in Amsterdam

Am 4. März isch s'Gotti Edith mi uf Amsterdam cho bsueche bis am 9. März. Mir hän 5 wunderschöni Täg gha (nit ufs Wätter bezoge) zäme und viel gseh und au sehr guet gässe :-)
Samstig: Do hani d'Edith mitgno an Albert Cuyp Markt. Mir sin alles gloffe, also viel unterwägs gsi. Dementsprechend mied simr au Zobe gsi :-) denn hämr welle ins Moeders go ässe, abr dört muess me immer reserviere, suscht het me kei Platz. Also hämr für em Sunntig reserviert und sin denn go ne feini Pizza ässe. Zum Abschluss simr denn no in d'Jazz Bar Alto. Ich bi sälber au no nie dört gsi, het mr abr wirklich guet gfalle, und s'witzige isch gsi, dass dr einti Musiker e Schwizer gsi isch :-) Noch em Usgang simr denn beidi gaaaaanz mied ins Bett gfalle!
Sunntig: D'Anja het mir e ganz e feins Kaffi empfohle, s'Bagles and Beans wo mr sin go zmörgele. Isch richtig fein gsi, mit früsche no warme Bagles und eme früsch presste Orangesaft etc. Gstärkt simr denn ins Centrum gloffe, das isch für uns abr au scho gnueg laufe gsi... drum hämr denn e Grachtefahrt gmacht. S'Wätter isch zur Abwechslig mol guet gsi und mir hän richtig viel gseh und au viel neus ghört. Wo d'Fahrt fertig gsi isch, hets au scho widr afo rägne, also hämr beschlosse ins Nemo z'go. Das isch verglichbar mit em Technorama. Dört hämr denn alles usprobiert... me chönnt glaub Stunde dört inne vrbringe. Und wie scho gseit simr denn Zobe im Moeders go ässe, das isch ächt empfehlenswert. S'Restaurant isch scho sehenswert, und denn hets ganz fründlichs Personal (was nit so selbverständlich isch für Amsterdam) und s'Ässe isch wirklich spitze gsi!
Mäntig: Do ich Zobe no holländisch Unterricht gha ha, hani dr Nomitag frei gno und denn simr ins Anne Frank Haus nochdäm mr gmietlich öbbis chlises gässe hän im Van Harte. Das hani mega spannend gfunde, und jetzt hani au es holländischs Buech zum läse und holländisch lerne :-)
Zischtig: Do hani leidr dr ganzi Tag miesse schaffe und d'Edith isch uf eigeni Fuscht Amsterdam go erkunde. Zobe simr denn abr widr zäme go ässe, und wie s'sich halt ghört in Amsterdam, simr go Pancakes ässe. Es git ganz e härzigi Pancake Bakery an dr Prinsengracht. Uf em Wäg dört ahne, hämr au plötzlich ufeme Auto e Fischreiher gseh! Ich ha gmeint ich spinn, dä isch eifach seeleruhig dört ghögglet und het sich fötele loh. Ich glaub ich bi maximal 2m vonem entfernt gsi!
Mittwuch: Do hani au widr miesse schaffe. Zobe hämr uns miesse entscheide was mr am letschte Obe no wän go ässe. Mir hän eifach z'wenig Öbe gha. Mir hän uns denn für Asiatisch entschiede und sin in e ganz e härzigs Thay Restaurant gange. Und wil mr kei Obe me gha hän zum go Griechisch Ässe, hämr abgmacht für am Mäntig in mine Ferie im April zum zäme mit em Georges in Grenzach go Griechisch ässe :-)
Donnschtig: Ich bi mol widr go schaffe und d'Edith isch au scho widr heime gfloge. Es sin ächt super Täg gsi wo viel z'schnell vrbi gange sin!

	Mit däm Boot hämr e Grachtefahrt gmacht. S'Gueti an däm isch, dass me au use cha wenn me möcht, abr uns isch es e bitz z'kalt gsi.
	Ich ha halt trotz de Schibe miesse es paar Föteli mache. Jetzt het me halt au immer no e chli s'Spiegelbild druf :-)
	e anderi Asicht vom Turm vo dr Westerkerk, allerdings mit Spiegelbild :-)
	Do simr mit unserem kleine Böötli dure Hafe gfahre vo Amsterdam. Das isch eins vo de Boot vom Hafedienst.
	Und das isch s'Nemo, wo mr au no ihne gange sin.
	Und das riesige Segelschiff ghört zum Schifffahrtsmuseum. Uf däm Föteli seht me die beide Götter: Vom Handel und vo dr Schifffahrt, wenn ich mi richtig erinnere.
	Do s'Segelschiff nomol in sinere ganze Schönheit :-)
	Und no useme andere Winkel.
	Do nomol s'Nemo. Dismol vom Land us ohni Spiegelbild :-)
	Das isch im Ikaufscenter Magna Plaza. Es isch e mega schöns und edles Ikaufscenter, allerdings nit sonderlich gross. Aber ich find es lohnt sich zums emol gseh ha. Und es git nit nur türi Sache dört, zwüschedure findet me au Sache für unser Budget!
	D'Ussicht vo dr Prinsengracht uf d'Westerkerk.
	Und do mi Fischreiher. Zersch hätten fascht nit gseh wil er fascht die glichi Farb het wie s'Auto. Me chönnt meine er tarnt sich.
	Do no e chli nöcher.
	Ups, er het sich bewegt, er lebt... :-)
	Das isch s'Restaurant Moeders mit gaaaanz vielne Föteli vo Müettere an de Wänd. Jede Platz het au e andere Täller und e anders Wyyglas. Das git ganz e spezielli, gmietlichi Atmosphäre!
	Und das isch s'Restaurant vo usse. Do fahr ich jede Tag vrbi wenn ich ins Gschäft fahr.