Deheim in Münchestei

Samstig: Am Samstig am Morge simr mit Swiss vo AMS uf BSL gfloge. Dörte het uns dr Papi abgholt und mir hän gmietlich im Auto chöne heime fahre. Deheime hämr uns denn emol e chli igrichtet etc. und Zobe simr mit dr Natascha ins A2 gange, es sich Ballermann-Party agseit gsi :-)
Sunntig: Mir hän gar nit allzu lang chöne usschlofe, do mir mit dr Dani und em Giuseppe uf Luzern gfahre sin. Dört hämr d'Stadt agluegt bi wunderschönem Wätter, e chli öbbis gässe und schliesslich simr no ins IMEX Kino. Isch e richtig schöne Tag gsi, und zum Abschluss hets denn bi uns no es Raclette-Ässe geh.
Mäntig: Mir sin mit dr Catherine in dr Uni-Mensa go Zmittag ässe. Jetzt hani endlich au emol e Basler Uni vo inne gseh. Aschliessend simr no echli go lädele, s'Wätter isch allerdings nit eso toll gsi, s'het immer widr afo rägne. Abr uf alli Fäll han ich endlich e Winterjacke gfunde wo mr gfalle het. Juhu!
Zischtig: Dr Michael und ich sin go wandere! :-) und zwar simr ufs Stanserhorn ufe gloffe. Es isch richtig schöns Wätter gsi zum wandere und me het e richtig gueti Ussicht gha. Zwüschedure hämr zwar scho fascht gmeint es chämi cho rägne bi dene Wolke, abr mir hän Glück gha. Zobe simr denn no mit dr Eva ins Des Arts gange, isch au schön gsi zum mol widr amene alt bekannte Ort z'si :-)
Mittwuch: Mir hän unseri Sache packt, widr alles ufgrumt und eifach no e chli dr Tag gnosse. Am spötere Nomitag hämr denn au scho widr zum Flughafe miesse zum zrugg uf Amsterdam fliege. Es sich e churzi, abr schöni Zit gsi deheime!

Luzern

	d'Dani und ich uf dr Kapellbruck
	das isch Luzern :-)
	und alli Blueme sin sogar um die Johresziit no so schön am blüehe
	das isch jo fascht wie in Bern :-)
	In dr Altstadt vo Luzern...
	...gits viel schön bemolit Hüüser
	Im Hintergrund seht me 3 vo de 9 Türm vo dr Museggmuure
	Mi Schatz und ich :-)
	Das Föteli het dr Michael gmacht und er het so Freud dra gha, dass ich das notürlich uf mini Website druf tue :-)
	e chli e anderi Ussicht uf d'Stadt
	das find ich so schön an Luzern, dr See und ganz nöch drhinter all die schöne Bärge!!!

Wanderig ufs Stanserhorn

	d'Jenny am Schueh wächsle
	e lessige Herbstbaum
	dr Titlis
	dr Pilatus
	bi däm Kapelleli versteckt in de Bäum hämr e chlin Pause gmacht
	jäjä, e frächi Chueh eifach z'mittst uf unserem Wäg... und kei Schritt het sie uf d'Site gmacht!
	unseri 2. Pause bimene chline Hüsli
	wow, was für e Ussicht
	Ussicht ufe Teil vom Vierwaldstättersee. Rechts ganz im Hintergrund seht me no dr Säntis

	was füre Bergpanorama
	e chli mehr vom Vierwaldstättersee

	Juhu, uf em Stanserhorn het me au chöne Touristeföteli mache... dr Michael mitere Schwizer Fahne, das gfallt mr :-)
	und do au no d'Jenny inere wunderschöne Tracht