Dani & Nadja uf Bsuech

Am 20. Juli Zobe isch d'Daniela mit ihrer Schwöster Nadja als ersti Station vo ihrer Reis durch dr Norde vo Holland bi mir acho. Ich bi se go abhole bi dr Zentral Station und denn simr zu mir heime, go ikaufe und hän öbbis feins zäme kocht. Mit koche, ässe und viel schwätze isch dr Obe au schnell ume gsi und mir hän scho miesse go schlöfele. Am Fritig hän sie sich denn sälber uf Entdeckigstour gmacht und d'Stadt e chli kenneglernt. Bi däm schöne Wätter isch das notürlich super! Zobe simr denn zäme go Mexikanisch ässe und durchs Rotliechtviertel gloffe und zum Abschluss no im Coco's öbbis go trinke.


Samstig: Juhu, Wucheend! Ich ha dr Dani und dr Nadja dr Noordermarkt zeigt und denn au grad no dr Markt in dr Parallelstross vo dr Westerstraat. Denn simr dr Vondelpark go aluege und chum simr widr in Richtig Stadt gfahre hets so richtig afo rägne. Drum simr denn au schnell heime und häns uns bi mir gmietlich gmacht, naja, sowiet e Ligretto Session halt gmietlich cha si :-) Dr Räge het abr zum Glück nit allzu lang aghalte und mir hän Zobe chöne im Trockene mit de Velos zu dr Party vo dr Nayeli fahre.

	d'Nayeli het alli zum tanze chöne animiere :-)
	sie sälber het notürlich au flissig tanzt
	und au die holländische Männer
	diskutiert worde isch au, vor allem notürlich mit de Händ :-)
	jäjä Dani, ich bi mr nit so sichr ob dir das grad so gfallt...
	d'Valérie und d'Nayeli, smile!!!
	d'Dani und ich, au am smile :-)
	d'Nayeli und ich
	die drei Chica's...
	d'Verlobigsparty vo dene 2 Verliebte, ich glaub me seht dass sie überglücklich sind :-) nögscht Joor wird ghürotet!

Sunntig: Zit für e chlini Velotour bi däm schöne Wätter! Mir drei hän zäme mit dr Saskia d'Velos packt und sin uf Zaanse Schans gfahre. Isch e super Tag gsi und mir häns richtig gmietlich gno und gnosse. Eso hani au emol e richtigi Mühli vo inne gseh, eini wo Erdnussöl gmacht het. Und ich ha gseh wie krass touristisch das ganze gmacht wird, es sin öbbe 10 Cars ufem Parkplatz gstande, bi froh gsi, dass mir mit em Velo däm ganze Rummel au hän chöne uswiche. Zobe simr denn alli todmied deheim acho, hän uns feini Spaghetti à la Cinque Pi kocht und hän alli guet und tief gschlofe :-)

	die ersti Mühli wo unsere Weg krützt het, do hets abr soooo viel Lüt gha, mir sin nit nöcher gange
	die 2. Mühli (und dr Bewis, dass mr au wirklich mit em Velo gange sin)
	d'Erdnussmühli wo mr sin vo inne go a luege
	uf dr Terrasse vo dr Mühli het me gseh, dass s'Dach usem gliche Material isch, wie die typische English Cottages.
	s'Mühlwerk
	alles massivs Holz
	und irgendwie alles mitenand verbunde
	do wärde d'Erdnüss gmahle
	drei Mühlene vo Zaanse Schans
	s'Dörfli gegenüber vom Fluss
	e Minimühli imene Garte
	Jetzt chani nümi wegrenne, in dene Rieseklumpen und mit minere neue Sunnebrülle :-)
	wow, wo me nur ahne luegt... alles Holzschueh...

Und schwup isch s'Wucheend au scho widr vrbi gsi. D'Dani und d'Nadja hän sich am Mäntig nomol elei uf Entdeckigstour begeh und bereits einiges ikauft :-) vor Amsterdam isch eifach niemer sicher! Zobe hets nomol e gmietlichi Spielrundi geh, dismol mit Uno und denn hämr au scho die letzti Nacht zäme vrbrocht. Am Zischtig hän sie sich denn witer ufe Wäg gmacht in Richtig Haarlem, wo sie das schöne Wätter au no e chli am Strand hän welle go gniesse (solangs no schön isch!).