Dani & Giuse uf Bsuech

Juhu, ich ha widr Bsuech kriegt... dismol vo mim Schwösterhärzli und em Giuseppe. Do sie zu zweit cho sin wärs i mim Zimmerli e chli eng worde und drum hän sie im Hotel Quentin übernachtet. Ok, dört sin d'Zimmer au sehr "kompakt" wie das dr Giuseppe so schön usdruckt het. Aber es isch uf alli Fäll im Vrglich recht priswert gsi und schön und an zentraler Laag! Nur leider hän die zwei voll Pech gha mit em Wätter, es het ächt kei einzige Tag geh wo sie trokke blibe sin. Sie hän abr trotzdäm vom Michael 2 Velos gha zum chli umefahre, das hani lessig gfunde, isch immer widr spannend z'gseh wenn öbber s'erste mol uf somene Omafiets fahrt :-) Ich ha übrigens au scho widr e neus Velo, isch jetzt mis dritte und ich hoff das bhalti jetzt bis Endi Joor. Das woni im Internet kauft ha isch kaputt gange und es wär so tür gsi zum repariere wie das woni jetzt kauft ha. Ha e guets Occasion Velo kauft bimene günstige Velohändler. Ha mega Freud dra, sött denn au no Föteli online stelle, ha abr no keini gmacht. So, jetzt abr zu unserem Programm...
Zischtig: D'Dani und dr Giuseppe sin mit em KLM Bus grad direkt vom Flughafe in d'Nöchi vo ihrem Hotel gfahre, dört ha ich die zwei abgholt und denn simr zum Michael gfahre (sie mit em Tram, ich mit em Velo). Er het kocht, es het Chrutspätzli geh, mega fein gsi. Zum Dessert hani no Muffins backe gha. Dört hämr denn ebbe zersch gässe und es Wyyli trunke und denn hämr alles e chli chöne abmache für die Täg wo sie in Amsterdam vrbringe. Spöter sin sie denn mit de Velos wo sie vom Michael hän chöne ha heime gfahre. Do dr Weg eigentlich ganz eifach isch (alles gradus, denn rechts und widr alles gradus) han ich se nit begleitet und sie hän sich prompt vrfahre :-) tja, für mi dr Bewis, dass ich nit ganz unfähig bi, wenn ich so an mini ersti Wuche zrugg däng.
Mittwuch: Ich ha miesse schaffe, drum sin d'Dani und dr Giuseppe elei uf d'Gass. Sie sin flissig go shoppe und no e chli im Zentrum umegloffe. Zobe han ich no Holländisch Unterricht gha bis am 10i, abr nochher simr no zu viert öbbis go trinke.
Donnschtig: Ich ha frei!!! Es isch Uffahrt! Abr d'Läde im Zentrum und dr Albert Cuyp Markt hän trotzdäm offe. Mir sin widr zu viert unterwägs gsi und sin an Albert Cuyp Markt. Es het zimlich viel Lüt gha. D'Dani und dr Giuse hän e früschi Stroopwafel gässe... mmhhh, isch ächt mega fein, muessi denn au emol no go ässe. Nochher hämr mit em Michael no e super Füerer gha und sin no es paar Sache go a luege wo ich sälber au nonig gseh ha (zumindest nit bewusst). Zobe hämr denn no dr obligatorischi Rundgang durch s'Rotliechtviertel gmacht.
Fritig: Ich ha widr miesse schaffe... abr hüt hani Bsuech becho :-) pünktlich uf d'Kaffipause hets an dr Türe glüte und dr Michael isch mir dr Dani und em Giuse mis Büro cho a luege und käffele. Mir hän äxtra no gevulde koeken kauft damit mr au öbbis chlises zum Kaffi hän. Ha Freud gha, dass sie cho sin, an so öbbis chönnt ich mi ächt gwöhne :-) dusse hets hüt nur gschifft... ächt ohni Unterbruch. Drum hän denn d'Dani und dr Giuseppe au e Grachtefahrt gmacht im Trockene (hän sie so odr so vor gha) und sin no im Nemo gsi. Zobe hets denn ändlich ufghört rägne, denn simr go Pannekoeken ässe und nochher am Rembrandtplein im Coco's e Cocktail go trinke.
Samschtig: Dr letschti Tag. Ich ha se mitgno an Noordermarkt. Dört hän sie Brennesselgouda kauft und no e andere Käs. Denn simr no an Lindenmarkt, dört han ich e Woog kauft vo Soehnle, für nur 10€ und d'Dani het se chöne mit heim neh (do bruchi se nit, abr deheim denn :-)). Denn simr no go Bitterballen ässe und im Supermarkt go Vrikandel kaufe. Denn hämr usegfunde, dass dr Interliner wo direkt an Flughafe fahrt au ab em Leidseplein fahrt, drum hämr no Glück gha zum no e Hanftee go trinke. Eso hän sie glaub wirklich fascht alles usprobiert wo sie hän welle: Frikandel/Kipcorn, Argentinisch, Pannekoeken, Poffertjes, Stroopwafels, Safari Cassis, Hanftee, gevoelde koek, etc. jo und jetzt sin sie scho widr uf em Heimweg. D'Zit goht eifach immer viel z'schnell vrbi.

	D'Dani und dr Giuse vor ere typische Kulisse in Amsterdam (es het emol nit grägnet)
	Dr Michael und ich uf eim vo dene grosse Bänggli vor dr Westerkerk, vo däne häni scho immer es Föteli welle!
	Mir unterwägs mit de Velos
	und do no mit eim vo dene typische Männerklos druf