Bina uf Bsuech

Mini Bina-Maus isch uf Bsuech cho uf Amsterdam... hm, ob das ächt guet chunnt mit 2 Holland Fans? ;-) notürlich chunnt das guet!
Donnschtig: D'Bina isch am 5i mit Easy Jet in Schiphol acho, das heisst ich ha se denn am Bahnhof abgholt do ich jo bis am 5i gschaffe ha. Denn simr als ersts grad emol mit em Velo go uswärts ässe, zäme mit dr Juliane und dr Saskia. Tja, und s'erst mol ufem Velo in Amsterdam isch nit immer so eifach... es git leidr au mängisch eso blödi Pföste zmitst ufem Velowäg... ich glaub ihr wüssed scho uf was ich use will :-) dr Bina ihrem Zeigefinger hets leidr nit eso guet do, abr suscht isch zum Glück nüt passiert!
Fritig: Ich ha notürlich widr miesse go schaffe und d'Bina het sich miteme Stadtplan sälber ufe Wäg gmacht. Zobe hämr denn zäme mit dr Juliane und Saskia öbbis feins kocht und e richtige Frauobe gha :-)
Samstig: Ich bi mit dr Bina uf e grossi Shoppingtour gange... und uuuups, ich ha glaub no nie so viel Gäld ufs Mol usgeh, abr es het sich so richtig glohnt :-)
Zobe simr go Pancakes ässe, es isch so warm gsi, dass mr sogar hän chöne dusse sitze. Und ich muess sage mir hän sehr viel Glück gha! D'Gäst am Nochbertisch hän nämlich mehr als nur 1 Vogeldreck abbecho... iiihhh!!! Denn hämr in Usgang welle, sin abr beidi so ko gsi, dass mr nocheme Drink im Coco's doch widr heime gange sin go schlöfele :-)
Sunntig: Wow, es sich scho über e ganzi Wuche schön in Amsterdam. Das muess ich notürlich au zäme mit dr Bina usnutze und mir sin an Strand gange. Mir hän dängt, mir mache zerscht no e chli e Dünewanderig, isch denn allerdings meh e Spaziergang näbem Velowäg worde :-) abr isch au schön gsi und zum Glück im Schatte! Zobe hämr denn no imene Restaurant gmietlich öbbis gässe.
Mäntig: Wie immer isch au das Wucheend plötzlich scho widr ume und ich ha widr miesse go schaffe. D'Bina het isch widr elei e chli unterwägs gsi und am 3 het sie sich au scho widr miesse ufe Wäg in Richtig Flughafe mache.

	Das tolle gäle Schloss han ich mir neu kauft am Märt. Das isch übrigens au mis neue Velo, mis erste isch mr jo emol klaut worde, s'zweite isch kaputt gange und jetzt hani das, und ich lieb!!! (drum au 3 Schlösser :-))
	D'Bina und ich fertig für e "Usgang"
	Uf unserem Spaziergang hämr glich e paar Düne gseh!
	Es Seeli zmittst in de Düne
	Mir sin denn noch unserem Spaziergang in Bloemendaal aan Zee glandet
	Wow, sone Strandhüsli hätti au gern
	Möve gits leidr an jedem Strand...
	wow, super Wätter!
	Wär isch das ächt?? :-)
	jäjä, Ebbe und Fluet seht me do in Holland immer sehr guet!